Ayiti Pou Ayisyen

Nous décodons l'info

Nous décodons l'info

humaaans/standing-2Created with Sketch.
humaaans/standing-3Created with Sketch.

Yo bare youn nan lidè pwotestasyon nan vil Hong Kong yo an kontak avèk konsila Meriken

Youn nan lidè pwotestasyon ki ap sekwe vil Hong Kong nan peyi Lachin depi mwa jen ane 2019 la ta sanble an kontak avèk ofisyèl nan konsila ameriken. Otorite Lachin yo mande peyi Etazini pou kanpe enjerans ke yo ap fè nan zafè politik lakay yo.

Yo bare youn nan lidè pwotestasyon nan vil Hong Kong yo an kontak avèk konsila Meriken  image

Credit Image: Ta Kung Pao

Kòmsi saa te ka sipran moun, youn nan aktivis ki nan tèt gwo mouvman pwotestasyon ki ap fèt nan vil Hong Kong nan peyi Lachin ta sanble an kontak avèk ofisyèl nan konsila meriken.

Depi plizyè mwa, yon gwoup sitwayen nan vil Hong Kong peyi Lachin ap fè gwo deblozay nan pwovens lan kote yo tanmen yon mouvman pwotestasyon pou yo mande gouvènman chinwa pou fè bak sou lwa ekstradisyon an. Gen lòt rezon ki mete kèk nan sitwayen sa yo nan lari ankò. Pa egzanp gen nan manifestan yo ki ap mande pou gen yon refòm demokratik ki fèt nan fonksyonman vil la.

Manifestan yo fè anpil lese frape avèk fòs otorite nan Hong Kong. Yo fè anpil dega. Yo menm rive barikade tèt yo anndan tout yon inivèsite e anpeche otorite yo rantre pandan plizyè jou. Pou defann yo kont lapolis, yo itilize koktèl Molotov ak anpil lòt zouti ke yo fabrike yo menm.

Depi mwa Jen kote gwo van manifestasyon sa yo ap sekwe vil Hong Kong, yo konte plis pase 2600 sitwayen ki blese. Lapolis peyi Lachinn fè plis pase 6000 arestasyon.

Nan semèn nan jounal chinwa ki rele Ta Kung Pao pibliye foto Joshua Wong Chi-fung, sekretè jeneral pati Demosisto avèk lidè mouvman parapli 2014 la ansanm avèk yon diplomat ameriken ki rele Julie Eadeh nan yon otèl byen chè kote yo tap pale.

Tit atik jounal kote foto saa yo pibliye a se: “Anba entèvensyon fòs etranjè”. Tit saa ale nan menm sans ak pawòl ke dirijan chinwa yo ap pale depi lè manifestasyon sa yo kòmanse kote yap akize leta meriken kòm kwa yo ta dèyè tout mouvman dezòd saa ki genyen nan vil Hong Kong nan.

Touswit aprè foto sa yo fin pibliye nan laprès, otorite chinwa yo mande peyi Etazini pou eksplike pou kisa rankont saa te fèt ant lidè mouvman pwotestasyon saa avèk diplomat la.

Sekretè pati Demosisto a di pat gen anyen ki mal kite pale nan rankont saa. Diskisyon ant li menm ak diplomat la te sitou pote sou kesyon dwa zimen ak demokrasi nan vil Hong Kong. Li pa wè pou kisa tout pale anpil sa yo paske li vwayaje plizyè fwa ale Washington na peyi Etazini. Nan kèk pòs li fè sou Facebook misye revele vwayaj li te fè Washington yo kote li rankontre ak anpil ofisyèl ameriken pami yo sekretè deta ameriken an.

Alòske peyi Etazini toujou ap akize lòt peyi trankou Larisi kòm kwa yo rantre nan zafè politik lakay yo. Nou remake ke ofisyèl ameriken toujou an kontak ak tout lidè ki ap destabilize lòt peyi. Sa rive deja nan pwoblèm politik nan peyi Venezyela, peyi Bolivi, etc.

« Paske batay la se nan lide li kòmanse »

Par:   Boukman Duty

Partagez sur vos reseaux: